Raus aus der Grossstadt- Rein ins Abenteuer

Am Friitig hani scho weder en Usflug in Agreff gno. Dasmol beni met em Bus 18 1/2 Stund in Süde abe gfahre. Mis Ziel Puerto Madryn, das ghört scho zu Patagonie. T Fahrt esch dur t Nacht gange und i ha erstundlech guet gschlofe! T Bus send sehr konfortabel. Sie händ breiti Setz, mer cha t Lehne wiit hende abe kippe und es het sones Teil fürt Füess, aso ganz bequem. De Usflug hani elei gmacht, well die meiste Studente das Wuchenänd zu de Wasserfäll Iguazu gfahre send. I be det ned met, welli das für nöchscht Wuchenänd planet ha. Es macht me Senn, welli nochher no e Wuche frei ha yum go reise und i de Norde wet go aluege. Zersch hani mer no überleit, öbi würkli elei sell go... Jetzt beni mega froh, dassi gange be! S esch es hammer Erläbnis gsi!!
Was esch de so speziell a Puerto Madryn? Es esch es chlises Städli, eigentli ehner es Dörfli am Meer, en Ferieort im Summer. Aber jetzt esch do jo Wenter, drum es au sehr ruhig und fasch usgstorbe. I gnüsse die Ruhe!! S esch s pure Gägeteil vo Bs.As. I be do hi greist well mer do cha Wal beobachte.
Am Samschtig nochdem i mis Hostel bezoge ha, beni de chli go s Städtli aluege und de uf es Dock use. Und was hani det usse gseh?! Scho de erscht Wal!! I ha mi mega gfroit! Er esch zwar zemli wiit wäg gsi aber glich! Das het t Vorfreud uf de Sunntig no ums X-fache gsteigeret! Am Sonntig hani en Usflug planet, wo uft Peninsula Valdes (UNESCO Kulturerb)use goht, vo wo us mer meteme Scheff ufs Meer use cha go Wal beobachte. De Usflug wär am 8ti los gange.. Aber ebe, er wär denn los gange, wenn de Guide cho wär... De esch aber eifach ned cho! Und ohni de döf mer ned i de National Park wot Scheff started. T Reseptionestin het aber alles ge und e Stund ume telefoniert, bes sie de öper het chöne organisiere. Susch hätte mers müesse ufe Mentig verschiebe, was für me unmöglech gsi wär, well mi Bus nach Bs.As. scho am 3 weder zrug fahrt! Aso hani doch mol Glück gha!!
Und es esch überwältigend gsi! Hammer, unglaublech, grossartig, super, genial, atemberaubend, unbeschrieblech!! I chas ned würkli i Wort fasse, drum lönd euch vo de Föteli überzüge, die gänd euch vellech en Huch vonere Ahnig, wasi erläbt ha...













Nochem Waltripp semmer no zunere Bucht wo mer Seeelefante und Seeloie gseh händ, ned halb so faszinierend, im Verlgich zu dem Spektakel wo eus t Wal bote händ. Aber au es Föteli wärt ;-)





Und damet ehr en Ahnig händ wie sauchalts gsi esch no die Föteli..





Ufem Heiwäg hämmer de no e Platte gha und zwar zmetst im Niergendwo.. Esch aber au ned wiiter erstundlech, wenn mer die Strosse aluegt. Die bestönd do nur us Staub, Sand und Ches...





Nochdem i am Mentig mol chli usgschlofe ha (dasmol imene super schöne Hostel!!) beni nomol uf s Dock use. Und det händ mer t Wal nomol es riese Spektakel zeigt! I ha chönne beobachte, wie sech t Wal paared. Das muess mer sech so vorstelle: Es esch eis Wiibli und öppe 7 Männdli. T Männdli kämpfed aber ned ums Wiibli, das goht ganz fredlech zue und her. Bi de Wal es so, dass s stärchschte Spermium günnt.. Wenn s Wiibli es Männdli ned wett, dreits sech eifach ufe Rügge und streckt t Flosse zum Wasser us. T Männdli umchreised s Wiibli und das Ganze passiert a de Wasseroberflächi, aso perfekt zum beobachte!! Genial!

Am 3 am Nomittag hani de t Heireis weder in Agreff gno... Dihei hätti mers ned chönne vorstelle, dassi für guet 2 Täg rund 40 Stund imene Bus verbrenge! I spenn doch ned! Hani emu gmeint.. Aber hey, das send ganz anderi Dimensione do :-) Und wennt chli öpis wetsch gseh vo dem Land muesch das eifach i Chauf ne..
Aso i glaub wenni zrug be vo de Reis, chani mer au en Tagestripp uf Münche vorstelle, gäll ehr zwoi ;-) was meined ehr?