Zwoi Woche in Buenos Aires

Wahnsenn, scho send zwoi Wuche vergange! I ha mi dihei jo scho emmer beklagt, dass de Tag zwenig Stunde het, aber do es no fasch schlemmer. Es get so vell z entdecke und z mache, dassi mer emmer z vell vor nehme für en Tag, und so chunts de halt au, dassi t Ufzgi äntweder no spoht ide Nacht mache oder ersch churz vor de Schuel. Da chönt eim doch au ergendwie bekannt vor cho ;-) Aber do duret au alles emmer einiges länger! Letscht Wuche hani zum Bispel 30min i de Post gwartet zum en simple Brief ufzge!
I de erschte Wuche esch mis Ziitmanagment zwar ned so schlemm gsi, welli de emmer am Morge Schuel gha ha. Letscht Wuche hani aber ersch vo 2-6 Schuel gha. Das het mer ned so passt, well so machi fasch nüt. Am Morge schlofi meistens chli länger und wenni de unterwägs be, muessi emmer uft Uhr luege, dameti ned z spoht it Schuel chome. Und do es au rächt schwerig abzschätze wie langt vo eim Ort zum Andere hesch, vorallem wennt met em Bus unterwägs besch. Leider hani nögscht Wuche grad nomol am Nomittag Schuel. Aber i ha mer vorgno, amigs chli früener ufsto, dameti au würkli nochli Sache cha mache. Be au nüm emmer so müed wie i de erschte Wuche. Do hani extrem Mühe gha met de Ziitumstellig!
Ehr wönd secher wüsse, wie s mer so gange esch di erschte zwoi Wuche und wasi so erläbt ha. Zersch mol es Paar beldlechi Idrück vo dere Stadt...

Aso ehr händ jo scho es paar Belder gseh, woni wohne. Für euch eschs jo velech logisch, dass sones Hus au en Alarmalag chönt ha. I ha aber kei Minute a das dänkt, halt typisch ich. Am Zischtigmorge beni wie nüt wär am 8.15 zum Hus us. S esch no niemert uf gsi vo minere Familie. Woni use be hani scho ghört das ergendwo en Alarm ab esch. I han ned gmerkt, dass de genau zu dem Ziitpunkt los esch, woni Türe ufto ha. So naiv wie i be hani dänkt, dass de ergendwo i de Nochberschaft ab esch.. De ganz Tag hani ke Minute me a das dänkt. Am Obe bim Znacht, het mer mi Gastvater de gseit, dassi de Alarm usglöst heig und so die ganz Familie gweckt ha! Zersch hets mer mega leid to. Jetz fendis aber mega luschtig, dassi s ned mol gschnallt ha! Naja, s Landei i de Grossstadt halt.. :-D
Öpis wiiters woni mi zersch muess dra gwöhne und woni zersch ha müesse merke esch, dass die Lüt do eigentli nur Sport i Fitnesscenter oder Sportclubs mache. Eifach mol rasch zum Hus us und de schön im Wald oder imene Park go jogge goht do ned, emu ned do woni wohne. Mis Gastmami het mer zwar vomene Park verzellt wo do ide nöchi esch. Aso beni am nögschte Tag det hi jogget (20min) de um de igmuret Park ume (nomol ca 15min.) zum merke, dasst gar ned i de Park ie chasch, alli Tor send zue gsi, met Security devor!! De beni halt nomol 20min. zrug! Und das alles uf Asphalt... Genau das woni gsuecht ha! :-( Woni de das im Gastmami verzellt ha, het sie nur glachet und gseit, dass de Park ned öffentlech zuegänglech esch..Super!!
Wenni wett go schwemme im Hallebad wo do ide nöchi esch, muessi es Fitnessabo löse, und das esch anschinend i jedem "Hallebad" so. Aso blibt mer wohrschindli ned vell anders übrig. Dasch chli frustrierend.
Wennt do am Obe ide Rush houer unterwägs besch und amene Lichtsignal muesch warte, gets es aso, dass zmetzt uf de Stross vor allne Auto eine afoht jongliere, Einrad fahrt oder susch Kunststückli macht. Churz bevors grüen werd schlenderet er durt Auto met em Huet zum Gäld verlange.
Anderi verdiened ehres Gäld idem sie am Obe met ehrne riese Wäge(gsänd ähnlech us wie Veloahänger, eifach grösser) durt Strosse ziend und t Abfallsäck usenand näme zum t Sache z sortiere. Eine sammlet nur Karton, en andere nur Pet etc. pro Kg wos abgänd bechömes de chli Gäld. De Hauptgedanke esch eigentli genial, aber die verdiene 3mol nüt für die Dräcksarbet wos mache! Letscht Wuche hani es chlises Meitli gseh,schätzigswiis ca 3 jöhrig, sie het im Abfall ume gwühelt,ehres Gsecht ganz dräckig und t Hoor ganz strähnig so fettig. Das Beld esch prägend und härzzeriessend! Was für e Zuekunft het sones Chend?!

I de Schuel büteds emmer so Aktivitäte a,wie Spaziergäng i de verschedene Barrios met Infos und gschechtleche Hintergründ, Aktivitäte wot Eigeschafte vo Argentiniere kenne lersch, oder Tanzstunde wie zb. Tango. I ha bis jetz scho einigi Stadtspaziergäng gmacht und de Tangogrundschrett glernt. Zudem hani glernt wie mer Truco spelt und ganz wechtig wie mer Mate zuebereitet. Mate esch DAS Getränk do, s Zuebereite und s Trenke esch e rechtigi Zeremonie und mer cha aso au einiges falsch mache.. De Gschmack vo Mate esch gwöhnigsbedürftig..

S erschte Wuchenänd beni met es paar Studente uf Uruguay. Am Samschtigmorge semmer met de Fähre nach Colonia del Sacramento. Det hämer de Tag verbrocht.






Am Obe semmer met em Bus wiiter nach Montevideo gfahre, wo mer imene Hostel übernachtet händ. Mer händ mega Glück gha, die wo noch eus ie cho send händ kes Bett me becho. Wo de Bsetzer de Nadja und mer s Zemmer (6er Zemmer, met 4 fremde Männer)esch cho zeige, het er en Desinfektionsspray met gno. Wo er is Zemmer ie esch, esch er wie en Irre im Züg umeghüpft und het de Spray ume gsprützt. Min erscht Gedanke: Iiii hets do ergendwelchi Kakerlake oder so en scheiss?!? Chönd euch jo vorstelle, was das für en Idruck henderloht! Gli drufabe hani de aber de Gstank gschmöckt und gseh wo er eigentli häre gsprayt het, nämli uft Socke und t Schue vo dem wo im Bett unter mer iquartiert gsi esch!! De Spray het leider ned würkli gnützt, es het abartig gstunke!! I ha di ganz Nacht min Schal umt Nase bunde, damets ned ganz so schlemm stenkt.. Esch aso e Nacht gsi zum abgwöhne!
Am Sunntigmorge semmer de mol uf de Märt. Det heschjetz alles chöne chaufe, vo Läbesmettel über Hushaltsartikel, Tier und uralte, kaputte Schrott wot di würkli frogsch, wer chauft so öpis!! Zum Bispel en kaputte Siitespiegel vomene Auto oder nur de Beldscherm vomene Laptop..

Nochem Märt semmer go t Stadt aluege. Mer het sie ned so gfalle, esch wie usgstorbe gsi, het vell wüeschti, verlottereti Hüser und dräckigi Plätz gha. I de Restaurants hesch müesse t Wenterjagge abhalte wells eifach so sau chalt gsi esch! Dasch aso nüm schön! I be de froh gsi, wo mer am 8ti weder uf de Fähre gsi send rechtig BsAs. Und weder einisch me het de Taxichauffeur de Wäg zu mim Dihei ned gfunde! Unglaublech.. I be de öppe am 1 dihei gsi, und doch froh, dassi am Mentig ersch am 2 Schuel gha ha.

Die zwoit Wuche beni weder mega vell i de Stadt ume gloffe. Do wär en Schrettzähler mol spannend.. Welli aber ebe am Nomittag Schuel gha ha, hani ned so vell gmacht.
Am Mettwoch hani no öper us de Heimat troffe :-) I ha met em Lili abgmacht zum go Znacht ässe. Es esch en mega gmüetleche Obe gsi, und i has rechtig gnosse weder mol chöne schwiizerdütsch rede.. Eifach rede ohni no lang müesse studiere, wieni jetz ächt das am beste säge und wie jetz das Wort scho weder uf spanisch oder englisch heisst..
Die zwoit Wuche hani de mol no mini Wösch it Wäscherei brocht. Woni sie de dihei weder uspackt ha, hani müesse merke, dass die do genau die gliche Problem händ wie mer alli jo au vo dihei kenne.. Ergendwie goht doch eifach emmer en Socke verlore! Und so es cho,dassi en vereinsamte Socke gha ha..
Am Fritigobe beni met zwoi Studentinne ine Tangoshow im La Ventana! Die esch eifach de Hammer gsi! Tango esch so en usdrucksstarche und elegante Tanz! T Schuhe und t Chleider vo de Fraue de Wahnsenn! Chas ned würkli beschriebe,s esch eifach genial gsi! Es send au no Lüt vom Land ufträtte, sie händ met Trommele, Gitarre, Ukulele und Panflöte Musig gmacht. Mega schön! In Hintergurnd händs Landschafte, Täler und Völker projiziert. S het s Gfühl vo unändlecher Freiheit usglöst. Unbeschrieblech! S het sech aso längschtens glohnt, und i chas jedem nur empfehle wo mol do esch!!

Höt hani de nomol met em Lili abgmacht. Mer send zäme dure Stadtteil Recoleta gschlenderet. Det befendet sech de berühemti Fredehof, wos ganz vell Familiegräber vo bekannte Argentinier het. Bi de einte chasch ieluege und de gsehsch t Särg und Föteli etc. anderi send gschlossni Hüser. Es het aso ganz imposanti Exemplar drunder. Anderi send aber au zemli verlotteret und kaputt..
Um de Friedhof ume eschs zemli turistisch, aber glich schön. Am Wuchenänd hets i de ganze Stadt verschedensti Märt, wie ebe au uf dem Platz vorem Fredhof. Mer send natürli dure gschlenderet und händs ned chöne lo, eus no Ohrering z chaufe ;-) Sie send ebe mega schön und händ umgrächnet ned mol ganz 3.-Fr. kostet,gäll Lili!?

So jetz esch scho weder fasch 1 znacht, Schwiizerzit 6i am Morge! Für me esch Ziit zum is Bett go und es paar vo euch händ secher scho weder uf müesse! Vermess euch!
Bis bald

Besitos us Argentinie